एक दिने समूह व्यवस्थापन तालिम सम्पन्न

तालिममा स्थानीय महिला सदस्यहरूको सहभागिता उल्लेखनीय रहेको थियो।यो तालिमको प्रमुख उद्देश्य महिलाहरूलाई समूह सञ्चालनका तरिका, लाभ, जिम्मेवारी तथा व्यवस्थापन सीपबारे स्पष्ट बुझाइ प्रदान गरिएको थियो। सहभागी महिलाले समूहमा काम गर्दा आवश्यक पर्ने आधारभूत क्षमता—जस्तै बैठक सञ्चालन गर्ने, निर्णय लेखाजोखा राख्ने, आर्थिक कारोबार पारदर्शी बनाउने तथा आपसी सहयोगका माध्यमबाट व्यक्तिगत र सामूहिक विकास कसरी गर्ने—जस्ता विषयहरूमा प्रशिक्षण प्राप्त गरे।

तालिमका प्रमुख अतिथि ललितपुर महानगरपालिका वडा नं. १२ की महिला सदस्य सरिता महर्जन रहनुभएको थियो। उहाँले महिला समूहहरू समुदाय विकासका प्रमुख आधार भएको उल्लेख गर्दै यस्ता तालिमले महिलालाई आत्मनिर्भर, सक्षम र नेतृत्व भूमिकामा अघि बढ्न ठूलो मद्दत पुर्‍याउने बताउनुभयो। स्थानीय सरकारका तर्फबाट महिलालाई लक्षित गरी धेरै योजनाहरू अगाडि सारिएको र त्यसको प्रभावकारी कार्यान्वयनका लागि समूहहरू सक्षम बन्नु आवश्यक रहेको उहाँको भनाइ थियो।

तालिमकी प्रशिक्षक ज्ञानी शोभा महर्जनले समूह व्यवस्थापनका आधारभूत सिद्धान्तदेखि व्यवहारिक पक्षसम्म विस्तृत रूपमा प्रशिक्षण दिनुभयो। उहाँका अनुसार, कुनै पनि समूह मजबुत बनाउन अनुशासन, नियमित बैठक, स्पष्ट लक्ष्य, पारदर्शिता र एक–अर्काप्रतिको विश्वास सबैभन्दा महत्वपूर्ण पक्ष हुन्।

ललितपुर महानगरपालिकाले महिलाहरूलाई लक्षित गरी सञ्चालन गर्न खोजेका कार्यक्रम तथा कार्यनीतिबारे पनि तालिममार्फत जानकारी गराइएको थियो। नगरपालिकाको भनाइ अनुसार, यस्ता तालिमहरूले महिलालाई सामाजिक तथा आर्थिक रूपमा सशक्त बनाउनुका साथै समुदायमा नेतृत्व लिन प्रेरित गर्छन्।सहभागी महिलाहरूले तालिमबाट समूहमा मिलेर काम गर्दा कस्ता–कस्ता फाइदा प्राप्त हुन्छन् भन्ने विषयमा व्यवहारिक ज्ञान पाएको बताए। उनीहरूले अब आफ्नो–आफ्नो समूहलाई अझ व्यवस्थित रूपमा अघि बढाउन आत्मविश्वास बढेको प्रतिक्रिया पनि दिए।

एकदिने भए पनि तालिमले महिलाहरूको व्यक्तिगत क्षमता, समूह सञ्चालन सीप र सामूहिक व्यवहार सुधारमा महत्वपूर्ण योगदान पुर्‍याएको आयोजकहरूले बताएका छन्।