प्रहरी–नागरिक सहकार्य बलियो बनाउन वडाको महत्वपूर्ण कदम

कार्यक्रममा ललितपुर महानगरपालिका वडा नं. ५ का वडा  अध्यक्ष विकास मान श्रेष्ठले प्रहरीप्रति कृतज्ञता व्यक्त गर्दै स्थानीय सुरक्षामा प्रहरीको भूमिकालाई उच्च प्रशंसा गरे। उनले वडामा उत्पन्न हुने हरेक समस्या, दुर्घटना वा आपतकालीन अवस्थामा प्रहरी तुरुन्त उपस्थित भएर सहयोग गर्दै आएको उल्लेख गर्दै, “वडा प्रशासन नागरिक सुरक्षासँग सम्बन्धित सबै विषयमा प्रहरीसँग सहकार्य गर्न सधैं तत्पर छ,” भने।

जिल्ला प्रहरी परिषद् जावलाखेलका प्रहरी प्रतिनिधि चक्रराज जोशीले पुनर्निर्मित प्रहरी विटले वडाको सुरक्षामा ठूलो सहजता आउने बताए। उनले पछिल्लो समय लागूऔषधिको समस्या धेरै ठाउँमा तीव्र रूपमा बढिरहेको र यसले चोरी, हिंसा तथा अन्य आपराधिक गतिविधि निम्त्याइरहेको जानकारी दिँदै, “लागूऔषधि प्रयोग, बिक्री–वितरणमा संलग्नलाई कानुनी दायरामा ल्याउनु अत्यन्त आवश्यक छ,” भने। उनका अनुसार, प्रहरी र नागरिकबीचको सहकार्य बलियो भए मात्र स्थानीय स्तरमा शान्ति–सुरक्षा प्रभावकारी रूपमा लागू हुन्छ।

वरिष्ठ प्रहरी नायब निरीक्षक पुरुषोत्तम नेपालीले पुनर्निर्माण कार्यमा वडाले देखाएको सहयोगले प्रहरीको मनोबल उच्च भएको बताए। “हामी कठिन अवस्थामा छौं भन्नु मात्र थियो, तर वडाले जुन सहयोग गर्‍यो, त्यसले ठूलो हौसला दियो,” उनले भने। उनका अनुसार, वडाबाट प्राप्त समर्थनले प्रहरी–नागरिक सम्बन्ध अझ सुदृढ बनेको छ।

वडा सदस्य शोभा देवी प्रदान श्रेष्ठले प्रहरी विट पुनर्निर्माण हुनु स्थानीय सुरक्षाका लागि अत्यन्त आवश्यक रहेको बताइन्। “स्थानीय बासिन्दाको सुरक्षा सुनिश्चित गर्न प्रहरी संरचना मजबुत हुनु अपरिहार्य छ। त्यसैले वडाले अग्रसरता लिएर विट पुनः निर्माण गर्नु आवश्यक थियो,” उनले भनिन्।

 वडा सचिव युवराज सैजुले प्रहरी देशभर नागरिकको हक–हित, शान्ति र सुरक्षाका लागि निरन्तर खटिने संस्थामध्ये एक भएकाले प्रहरीसँगको सहकार्यले वडामा उत्पन्न हुने समस्या छिटो समाधान गर्न सहयोग पुग्ने बताए।

प्रहरी विट हस्तान्तरण कार्यक्रम वडाका जनप्रतिनिधि, स्थानीयबासी तथा प्रहरी अधिकारीहरूको उपस्थितिमा सम्पन्न भयो। सहभागीहरूले पुनः सञ्चालनमा आएको प्रहरी विटले वडा नं. ५ मा अपराध नियन्त्रण, निगरानी तथा सुरक्षा व्यवस्थापनमा थप प्रभावकारी भूमिका खेल्ने विश्वास व्यक्त गरे।