नेपाल राष्ट्रिय खड्गी समाज, ललितपुर जिल्ला समितिको चौथो अधिवेशन सम्पन्न
Date: 2025-11-24
ललितपुर— नेपाल राष्ट्रिय खड्गी समाज ललितपुर जिल्ला समितिको चौथो अधिवेशन भव्य रूपमा सम्पन्न भएको छ। संगठनलाई अझ सुदृढ बनाउने लक्ष्यसहित गरिएको अधिवेशनमा समाजका पदाधिकारी, सदस्य, मूल्यवान अतिथि तथा स्थानीय प्रतिनिधिहरूको उल्लेखनीय उपस्थिति रहेको थियो।
अधिवेशनले विगतको कार्य समीक्षा, आगामी वर्षका योजनाहरू, सामाजिक गतिविधिहरूको विस्तार तथा समुदायबीच एकता र सहकार्यलाई मजबुत बनाउने विषयमा विस्तृत छलफल गरेको थियो।कार्यसूची अनुसार निर्वाचन प्रक्रिया सञ्चालन गरिएपछि नयाँ जिल्ला कार्य समिति चयन गरिएको छ। अधिवेशनले भगवान शाहीलाई सर्वसम्मत रूपमा अध्यक्षमा चयन गरेको हो। साथै, बसन्त खड्गी, अपिल शाही, र बसन्त शाहीलाई उपाध्यक्षका रूपमा मनोनयन गरिएको छ।
त्यसैगरी सचीव सपना खड्गी र रबिना खड्गीलाई सह–सचिवको जिम्मेवारी दिइएको छ। मिना शाहीलाई कोषाध्यक्ष तथा रमिला शाहीलाई सह–कोषाध्यक्षका रूपमा चयन गरिएको अधिवेशनले जनाएको छ।अधिवेशनले ७५ जना जिल्ला सदस्यहरूको समावेशसहित व्यापक तथा सक्रिय जिल्ला कार्य समिति गठन गरेको छ। यसले संगठनलाई अझ संगठित तरिकाले अगाडि बढाउन मद्दत गर्ने अपेक्षा गरिएको छ।नयाँ नेतृत्वले समुदायभित्र सामाजिक विकास, आपसी सहयोग, सांस्कृतिक संरक्षण र खड्गी समुदायको पहिचान प्रवर्द्धनका कार्यक्रमहरूलाई प्राथमिकता दिने प्रतिबद्धता व्यक्त गरेको छ।
अधिवेशनमा उपस्थित सहभागीहरूले समाजको गतिविधि थप प्रभावकारी, पारदर्शी र जिम्मेवार बनाउन नयाँ समिति सक्षम हुने विश्वास व्यक्त गरेका छन्।