एक दिने कौसीखेती सम्बन्धी प्रशिक्षण तथा सामग्री वितरण कार्यक्रम
Date: 2025-11-29
ललितपुर - ललितपुर महानगरपालिका वडा नं. ५ ले वडावासीहरूलाई लक्षित गरी एक दिने कौसीखेती सम्बन्धी प्रशिक्षण तथा सामग्री वितरण कार्यक्रम सफलतापूर्वक सम्पन्न गरेको छ।
वडा कार्यालयले विगतका वर्षहरूजस्तै यस वर्ष पनि कौसीखेतीलाई प्रोत्साहन गर्दै आवश्यक सामग्रीहरू वितरण गरेको छ। कार्यक्रमअन्तर्गत ७० जनालाई कम्पोस्ट बिनसहित घरमै अर्गानिक खेती सुरु गर्न आवश्यक सामग्रीहरू प्रदान गरिएको वडा कार्यालयले जनाएको छ।
ललितपुर महानगरपालिका वडा नं. ५ का वडा अध्यक्ष विकासमान श्रेष्ठले स्वस्थ जीवनका लागि अर्गानिक तरिकाले तरकारी उत्पादनको महत्व जोड दिँदै, वडाले हरेक वर्ष यस्तो तालिम र सामग्री वितरण गर्दै आएको बताउनुभयो। उहाँका अनुसार कौसीखेतीले स्वास्थ्य, वातावरण र आर्थिक पक्षमा सकारात्मक प्रभाव पार्ने भएकाले यसलाई अझ विस्तार गर्ने लक्ष्य छ।
कार्यक्रमका प्रशिक्षक सुबास दाहालले कौसीखेती गर्दा ध्यान दिनुपर्ने विषय, माटो व्यवस्थापन, कम्पोस्टको सही उपयोग, रोग–कीरा प्राकृतिक नियन्त्रणका विधि लगायतका महत्वपूर्ण सीपहरू सिकाउनुभयो। सहभागीहरूले तालिम व्यवहारमै उपयोगी र सहज रूपमा लागू गर्न सकिने भएको प्रतिक्रिया दिएका छन्।
कार्यक्रममा वडा नं. ५ की महिला सदस्य शोभा देवी प्रदान श्रेष्ठ, मञ्जु रिजाल, सदस्य अशोक श्रेष्ठ, पुर्नम निरौला, वडा सदस्य युवराज सैजुलगायतको सक्रिय उपस्थिति रहेको थियो।
