उपत्यकाब्यापी कराँते प्रतियोगिता २०८३ सुरु

ललितपुर - ज्यापू समाज यल युवा तथा मेलमिलाप विभाग अन्तर्गत युवा तथा खेलकुद उपसमितिको आयोजनामा ‘उपत्यकाब्यापी कराँते प्रतियोगिता २०८३’ सुरु भएको छ । प्रतियोगिता प्रदेश खेलकुद विकास परिषद्, बागमती प्रदेशको प्रायोजनमा सञ्चालन भइरहेको हो ।

कार्यक्रममा ज्यापू समाजका अध्यक्ष सन्तमान महर्जनले ज्यापू समाज स्थापना भएको ३२ वर्ष पूरा भएको स्मरण गर्दै “हाम्रो कला, हाम्रो संस्कृति सबै जगै राखौँ” भन्ने नाराका साथ समाज अघि बढिरहेको बताउनुभयो । उहाँले भाषा, कला र संस्कृतिको संरक्षणसँगै शिक्षा, स्वास्थ्य तथा सामाजिक क्षेत्रमा समेत विभिन्न कार्यक्रम सञ्चालन गर्दै आएको जानकारी दिनुभयो । साथै कराँते प्रतियोगिताले बालबालिका तथा युवाहरूमा अनुशासन, आत्मसुरक्षा र आत्मविश्वास अभिवृद्धि गर्न महत्त्वपूर्ण भूमिका खेल्ने धारणा राख्नुभयो ।

युवा तथा खेलकुद उपसमितिका संयोजक बुद्ध डंगोल ले प्रतियोगिताका लागि बागमती प्रदेशबाट बजेट व्यवस्थापनमा सहयोग प्राप्त भएकोमा धन्यवाद व्यक्त गर्दै प्रतियोगिता सफलताको शुभकामना दिनुभयो ।

कार्यक्रममा कराँतेका विभिन्न प्रस्तुति प्रदर्शन गरिएको थियो भने उत्कृष्ट खेलाडीहरूलाई मेडल प्रदान गरी सम्मानसमेत गरिएको आयोजकले जनाएको छ ।