३८ वटा हलमा ‘पूर्ण बहादुरको सारंगी’ ले मनायो ५१ औं दिन

सर्वाधिक कमाइ गर्ने नेपाली फिल्म ‘पूर्ण बहादुरको सारंगी’ ५१ औं दिनमा प्रदर्शनरत छ। कार्तिक १५ गतेबाट रिलिज भएको यस फिल्मले शुक्रबार ३८ वटा हलमा प्रदर्शनको ५१ औं मनाएको निर्माण टिमले जनाएको हो।

धेरै हलहरुमा ५१ औं दिन मनाउने यो पहिलो फिल्म समेत बनेको छ। यस फिल्मले हालसम्म ५० करोड ग्रस कलेक्सन गरिसकेको छ।यस फिल्ममा विजय बराल र अञ्जना बराइलीको मुख्य भूमिका रहेको छ। साथै बुद्धि तामाङ, प्रकाश सपुत, देशभक्त खनाल, अलिशा बास्कोटा, मुकुन भुसाल, भोलाराज सापकोटाको अभिनय छ।

सरोज पौडेलको कथा र निर्देशन रहेको फिल्मलाई विनोद पौडेल र प्याट्रिक सुवेदीले निर्माण गरेका हुन्। फिल्मको पटकथा र संवाद महेश दवाडीले लेखेका हुन्। सेभेन सिजको प्रस्तुति रहेको यो फिल्म एक करोड ३० लाखमा बनेको हो।