ललितपुर महानगरको चौथो उद्यमी सम्मेलन सम्पन्न

मन्त्री भण्डारीले सभ्यतासँग जोडिएको उत्पादनलाई ब्रान्डिङ गर्नुपर्ने बताउँदै हस्तकलालाई प्राथमिकतामा राख्नुपर्ने प्रष्ट पारे । आगामी आर्थिक वर्षको नीति तथा कार्यक्रममा उद्योग र उद्यमीसँग सम्बन्धित ३१ वटा बुँदाहरु समेटिएको बताए । मन्त्रालयले उद्यमशीलता प्रबद्र्धन गर्न र उद्यमीलाई प्रेरित गर्न न्यून ब्याजदरमा ऋण उपलब्ध गराएको बताए । उत्पादकत्वमा वृद्धि गरेर मुलुकको अर्थतन्त्र विकास गर्न जोड दिए । 

ललितपुर महानगरका चिरीबाबु महर्जनले महिला उद्यमीलाई प्रेरित गर्न बिउ पूँजीको व्यवस्था गरेको बताए । उनले भने, ‘ हामी ललितपुरको उत्पादनलाई विश्वभर चिनाउन चाहन्छौ, त्यसको लागि दत्तचित्त भएर काम गर्नुस ।’ उद्यम गर्न चाहने महिलालाई महानगरले प्रेरित गरेको बताइन् । जिल्ला समन्वय समिति ललितपुरका सभापति ऋषिदेव फुँयालले उद्यमी महिललाई सम्मान गर्न कार्यक्रम आयोजना गरेको धन्यवाद दिदैं यस्ता कार्यक्रम अत्यन्तै उपयोगी हुने बताए । 

ललितपुर महानगरका उपप्रमुख मञ्जली शाक्य बज्राचार्यले उद्यमी महिलालाई हौसला र प्रेरणा दिनसम्मेलन आयोजना गरेको बताइन् । खस्कदै गएको अर्थतन्त्रलाई उकास्न उद्यम र उद्यमीलाई प्राथमिकता दिनुपर्ने धारणा राखिन् । उद्यमी बन्नु चुनौतिपूर्ण र पृथक काम भएको बताउँदै त्यो आँट गर्नु सबैभन्दा ठूलो र गर्व गर्न लायक कदम भएको जिकिर गरिन् । ललितपुर महानगरमा तीन हजार भन्दा बढी महिला उद्यमी भएको जानकारी दिइन् । उपप्रमुखका अनुसार महानगरले महिला उद्यमीले उत्पादन गरेको उत्पादनको सूचीकरण गर्ने तयारी गरिरहेको छ । 

प्रमुख प्रशासकीय अधिकृत रेखादास श्रेष्ठले महिला उद्यमीको सीपमा लगानी गरेर प्रविधिसँग जोड्दै उत्पादनको बजारिकरण गर्न महानगरले महिला उद्यमीलाई प्रेरित गरेको बताइन् । महिला उद्यमशिलता व्यक्तिगत उपलब्धि मात्रै नभएको बताउँदै समाज र राष्ट्रको समृद्धिसँग जोडिएको विषय भएको धारणा राखिन् । 

महिला विकास शाखाकी प्रमुख शोभा खरेलले मुलुकका अन्य स्थानीय तहको भन्दा महानगरको महिला उद्यमशिलता केन्द्र सक्रिय रहेको बताउँदै उद्यमशिलतालाई प्रोत्साहित गर्न महानगरले सम्मेलन आयोजना गरेको बताइन् ।  कार्यक्रममा उनले उद्यमशिलता र महिला उद्यमीको बारेमा तयार पारेको विवरणात्मक  प्रस्तुतिकरण प्रस्तुत गरेकी थिइन् । 

ललितपुर महानगरले विभिन्न क्षेत्रमा उद्यम सिर्जना गरेका उद्यमी महिलालाई सम्मान गरेको छ । सम्मानित हुनेमा वडा नं.१३ स्थित आमाज क्रियसनकी सुरुची खड्का, वडा नंं.३स्थित कटन केयर होमकी हसना महर्जन, वडा न ं१९स्थित नेटमेड फार्मेसीकी सुप्रिया शाक्य, वडा नंं.२३ स्थित जरा सोसल भेन्चर प्रा.लिका हेमा श्रेष्ठ छन् । त्यसैगरी वडा नं. २२ स्थित रानीदेवी कृषि तथा पशुपालन फार्म प्रा.लिका नानीमाया नेपाली, वडा नं.७ स्थित नेवाः नशाः घासाःकी दिलमाया महर्जन, वडा नंं.११ स्थित निभा ट्रेड इन्टरप्राइजेजकी निलिमा बज्राचार्य, हरिसिद्धी वडा नं.२८ स्थित वःसकी दिपा कर्माचार्य , वडा नंं १९ स्थित बेष्ट टे«डसकी सुनिता बज्रचार्य, वडा नं.२ स्थित न्हू डिजाइन्सकी रश्मि तण्डुकार सम्मानित भएका छन् । सम्मानित हुनेलाई दोसल्लासहित सम्मान पत्र गरिएको थियो ।