खेलकुद विकासतर्फ महानगरको अग्रसरता : टेबल टेनिस तालिम हल तयार

कार्यक्रमको प्रमुख अथिति ललितपुर महानगरपालिकाका  प्रमुख चिरीबाबु महर्जनले टेबल टेनिस तालिम हलको समुद्घाटन गर्दै महानगरले खेलकुद क्षेत्रलाई उच्च प्राथमिकताका साथ अघि बढाइरहेको बताए। उनले भने, “यो तालिम हल सुरुवात मात्र हो। आगामी दिनहरूमा अरु वडाहरूमा पनि यस्ता आधुनिक तालिम केन्द्र निर्माण गर्दै स्थानीय खेलाडीलाई अवसर उपलब्ध गराइनेछ।” महर्जनका अनुसार महानगरको लक्ष्य स्थानीय स्तरमै प्रतिभा पहिचान गरी राष्ट्रिय तथा अन्तर्राष्ट्रिय स्तरमा सक्षम खेलाडी उत्पादन गर्नु रहेको छ।

कार्यक्रममा ललितपुर महानगरपालिका वडा नं. ९ का वडा अध्यक्ष तथा महानगरका प्रवक्ता राजु महर्जनले तालिम हल स्थापनाले ललितपुरमा खेलकुदको गुणवत्ता अझै मजबुत बन्ने विश्वास व्यक्त गरे। उनले बालबालिकाले सानो उमेरमै सही प्रशिक्षण पाउने वातावरण निर्माण हुनु खेलकुद विकासका लागि महत्त्वपूर्ण कदम भएको बताए। “यो तालिम हलले भविष्यमा उत्कृष्ट खेलाडी उत्पादन गर्नेछ,” उनले भने।

त्यस्तै ललितपुर महानगरपालिका वडा नं. १२ का वडा अध्यक्ष नारायणलाल अवालेले स्थानीय स्तरमै सहज पहुँचयुक्त तालिम सुविधा उपलब्ध भएपछि बालबालिकाको प्रतिभा निखारिन मद्दत पुग्ने बताए। उनले अभिभावकलाई आफ्ना बालबालिकालाई नियमित तालिममा सहभागी गराई खेलकुदमा उदाउँदो सम्भावना विकसित गर्न आग्रह गरे।

ललितपुर महानगरपालिका र खेलकुद विकास समितिको सहकार्यमा स्थापना गरिएको यो तालिम हल स्थानीय सरकारद्वारा खेलकुदमा गरिएको लगानीको उल्लेखनीय उदाहरणका रूपमा प्रस्तुत भएको आयोजकहरूले बताएका छन्।