डायबेटिस सम्बन्धी जनचेतना कार्यक्रम सफलतापूर्वक सम्पन्न
Date: 2025-11-30
ललितपुर — लायन्स इन्टरनेशनल अन्तर्गत LCK Divine Energy ले आयोजना गरेको डायबेटिस सम्बन्धी जनचेतना कार्यक्रम आज ललितपुरमा सफलतापूर्वक सम्पन्न भएको छ। समुदायमा स्वस्थ जीवनशैलीको महत्व र डायबेटिसबारे जानकारी बढाउने उद्देश्यले गरिएको यो कार्यक्रम योसास क्लिनिक को प्राविधिक सहयोग तथा लायन जीवन महर्जनको संयोजनमा संचालन गरिएको हो।
कार्यक्रमका मुख्य स्रोत व्यक्ति डा. क्षितिज बराकोटीले डायबेटिस के हो, कसरी लाग्छ, यसको प्रारम्भिक लक्षणहरू के–के हुन् भन्नेबारे सरल भाषामा प्रस्तुत गर्नुभयो। उहाँले खासगरी गलत खानपान, शारीरिक क्रियाकलापको कमी, तनाव, वंशानुगत कारण र अस्वस्थ जीवनशैली डायबेटिस बढ्ने मुख्य कारण रहेको बताउनुभयो।डा. बराकोटीले नियमित स्वास्थ्य परीक्षण, समयमै चिनीको जाँच, स्वस्थ आहार, दैनिक व्यायाम तथा औषधिको नियमित प्रयोगद्वारा डायबेटिसलाई नियन्त्रण गर्न सकिने स्पष्ट गर्नुभयो।
ललितपुर महानगरपालिका वडा नं. ५ का वडा अध्यक्ष विकास मान श्रेष्ठले अहिले बजारमा पाइने धेरै खानेकुरा र तरकारी विषादीयुक्त हुन सक्ने हुँदा स्वास्थ्यमा असर पर्ने गरेको बताउनुभयो। उहाँले यस्तो अवस्थाबाट बच्नको लागि सबैले घरमै बढी उत्पादन गर्न, सकेसम्म प्राकृतिक खाना खाने तथा दैनिक योग र व्यायामलाई जीवनशैलीमा समावेश गर्नुपर्ने आवश्यकताबारे ध्यानाकर्षण गराउनुभयो।
कार्यक्रममा लायन्स क्लब अन्तर्राष्ट्रिय डिस्ट्रीक ३२५ आई नेपालका भाइस डिस्ट्रीक गर्भनर लायन सूर्य कुमार के. सीले लायन्स क्लबले विगतदेखि नै मोतिबिन्दु, स्वास्थ्य जाँच, रक्तदान तथा अन्य विभिन्न स्वास्थ्य–सम्बन्धी कार्यक्रमहरु सञ्चालन गर्दै आएको जानकारी दिनुभयो। विश्वभर अत्यधिक रुपमा बढ्दो डायबेटिस रोगलाई रोकथाम तथा सचेतनामार्फत नियन्त्रण गर्न सकिने भएकाले यस कार्यक्रमको आयोजना गरिएको उहाँको भनाइ थियो। उहाँले दिनमा कम्तिमा एक घण्टा शारीरिक व्यायाम गर्ने बानीले मानिसलाई धेरै रोगबाट जोगाउन मद्दत गर्नेमा जोड दिनुभयो।
त्यसैगरी, LCK Temple Ma Harati का अध्यक्ष अनिल चित्रकार र LCK Divine Energy का अध्यक्ष सुरेश कृष्ण श्रेष्ठले कार्यक्रमको स्वागत मन्तव्य राख्दै, समुदायमा नियमित रुपमा यस्ता जनचेतनामूलक कार्यक्रम गर्न सके जनस्वास्थ्यमा सकारात्मक प्रभाव पर्ने बताउनुभयो।
कार्यक्रममा वडा नं. ५ का जनप्रतिनिधि, महिला समूहका प्रतिनिधि, LCK Temple Ma Harati, LCK New Reiki Club का सदस्य तथा स्थानीय बासिन्दाहरूको उल्लेखनीय उपस्थिति रहेको थियो। सहभागीहरूले कार्यक्रममा प्राप्त जानकारीले आफूहरूलाई डायबेटिसको जोखिम, लक्षण, रोकथाम र उपचारबारे अझ स्पष्ट रूपमा बुझ्न सहयोग पुगेको प्रतिक्रिया दिएका छन्।
समुदायमा स्वास्थ्यप्रति सचेतना फैलाउने उद्देश्यले गरिएको यो कार्यक्रम अत्यन्तै प्रभावकारी, उपयोगी तथा जानकारीमूलक रहेको आयोजकले बताएका छन्।
