सरस्वती घिमिरेको एकल मुक्तक वाचन सम्पन्न

बन्धु फिल्म्स प्रालिको आयोजनामा सोमबार चलचित्र विकास बोर्ड नेपालको सभाहलमा आयोजित एकल वाचन कार्यक्रममा घिमिरेले आफुद्वारा लिखित  मुक्तकहरु वाचन गरेकी हुन् ।

एकल मुक्तक वाचन कार्यक्रमका सभापतिपति साहित्यकार खेमराज दाहाल रहेका थिए भने बरिष्ठ कलाकार एबम कलाकार संघका अध्यक्ष मोहन निरौला प्रमुख अतिथिको रुपमा सहभागी थिए । उक्त अवसरमा बन्धु फिल्म्स प्रालिले कवयित्री घिमिरेलाई  साहित्य क्षेत्रमा निरन्तर कलम चलाएको योगदानको सम्मान स्वरुप नगद रु १० हजार र कदरपत्रसहित सम्मान गरेको छ । 

घिमिरेले एकल मुक्तक वाचनमा आफ्ना २० वटा मुक्तकहरु वाचन गरेकी छिन् । उनका रचनामा जीवन जगत, देशप्रेम , मातृत्व सहित आफूले समेत देखेका र भोगेका सङ्घर्षका प्रसंगहरु उजागर गरिएका छन् । कार्यक्रममा शुभकामना व्यक्त गर्दै साहित्यकार रमेश शुभेच्छुले नारी जीवन र सिँगो देशका समस्या तथा दु: खसुखलाई सरस्वती घिमिरेका रचनामा उजागर भएको बताए । साथै जनयुद्धका समयमा द्वन्द व्यवस्थापन नभएका विषयहरुको साथै समाजभित्रको वर्गीय खाडललाई समेत मार्मिक रुपमा प्रस्तुत गर्ने घिमिरेले मानिसलाई अभिप्रेरित गर्ने सुक्तिमय मुक्तकहरुको रचना गरेर साहित्यमा योगदान दिएको चर्चा गरे  । 

यसैगरी व्यवसायी राजेन्द्र सङ्ग्रौलाले साहित्यिक राज्य तथा नीजि क्षेत्रले साहित्य र सिर्जनाको उजागरमा लगानी गर्न सके सर्जकहरुको प्रतिभा र सिर्जना अझै फस्टाउन सक्ने भन्दै सरस्वतीका रचनाले नयाँ पुस्तालाई पनि असल साहित्यिक मार्गमा डोर्याएको बताए  ।

कलाकार उत्तम केसीले अबका दिनमा सरस्वतीको साहित्यिक पाईलाहरु कहिल्यै नरोकिउन भन्ने शुभकामना व्यक्त गरे । बन्धु फिल्म्स प्रालिका अध्यक्ष एबम वरिष्ठ कलाकार लय सङ्ग्रौलाले अत्यन्तै रसिक ढंगले कार्यक्रमको सञ्चालन गरेका थिए ।